Ինչ է կատարվել Կատարում․պայմանավորված սպանությո՞ւն,թե՞ Իսրայելի ամենաթողություն

Իսրայելը սեպտեմբերի 9-ին փորձել է սպանել ՀԱՄԱՍ-ի քաղաքական առաջնորդներին Քաթարում օդային հարվածով՝ սրելով իր ռազմական գործողությունները Մերձավոր Արևելքում:

Իսրայելական պաշտոնյաները Reuters-ին հայտնել են, որ հարվածը ուղղված է եղել ՀԱՄԱՍ-ի բարձրաստիճան առաջնորդներին, այդ թվում՝ Հայյային: Իսրայելը դեռևս տեղեկություններ է հավաքում հարվածի մասին և դեռ պետք է պարզի, արդյոք սպանվել են ՀԱՄԱՍ-ի պաշտոնյաներ կամ առաջնորդներ, հայտնել է հարցին ծանոթ անձը:

ՀԱՄԱՍ-ը հայտնել է, որ հարձակման հետևանքով զոհվել են իր ներկայացուցիչներից հինգը, այդ թվում՝ ՀԱՄԱՍ-ի աքսորված Գազայի ղեկավար և գլխավոր բանակցող Խալիլ ալ-Հայյայի որդին: Խմբավորումը հայտարարել է, որ Իսրայելին չի հաջողվել սպանել իր բանակցային թիմի բոլոր անդամներին։

ՀԱՄԱՍ-ի քաղաքական բյուրոյի անդամ Սուհայլ ալ-Հինդին Al Jazeera հեռուստաալիքին հայտնել է, որ խմբավորման բարձրագույն ղեկավարությունը ողջ է մնացել:

Իսրայելը ի սկզբանե չի խուսափել պատասխանատվությունից ու չի թաքցրել, որ Կատարին հարվածել է հենց ինքը։ Քաթարը հայտարարել է, որ Իսրայելը դավաճանություն է գործել և զբաղվել է «պետական ահաբեկչությամբ»: Քաթարի վարչապետ Շեյխ Մոհամմեդ բին Աբդուլռահման ալ-Թանին ասել է, որ օդային հարվածները սպառնում են խափանել Քաթարի միջնորդությամբ ՀԱՄԱՍ-ի և Իսրայելի միջև ընթացող խաղաղ բանակցությունները:

Թրամփի վարչակազմը հարձակման մասին նախազգուշացում է ստացել ԱՄՆ զինվորականներից, հայտնել է Թրամփը սոցիալական մեդիայում ավելի վաղ կատարած հայտարարությունում: Սակայն չի նշել՝ արդյո՞ք Իսրայելն է տեղեկացրել ԱՄՆ զինվորականներին:

Թրամփը հայտնել է, որ հանձնարարել է իր դեսպան Սթիվ Ուիթքոֆին զգուշացնել Քաթարին հարվածի մասին, սակայն Քաթարը հերքել է այդ հայտարարությունները՝ նշելով, որ հարձակումից առաջ նախազգուշացման մասին լուրերը կեղծ են, և ԱՄՆ պաշտոնյայի զանգը ստացվել է այն ժամանակ, երբ Քաթարի մայրաքաղաք Դոհայում արդեն լսվել են պայթյուններ:

«Քաթարը վերապահում է այս բացահայտ հարձակմանը պատասխանելու իրավունքը և կձեռնարկի բոլոր անհրաժեշտ միջոցները»,- ասել է ալ-Թանին լրագրողներին: Քաթարը հայտնել է, որ Իսրայելը հարձակման հետևանքով սպանել է Քաթարի ներքին անվտանգության ուժերի մեկ անդամի և վիրավորել մի քանիսին:

ԱՄՆ-ն այս գործողությունը որակել է որպես միակողմանի հարձակում, որը չի ծառայում Ամերիկայի և Իսրայելի շահերին: Դոնալդ Թրամփը հայտարարել է, որ «շատ դժգոհ է» Իսրայելի հարվածի բոլոր ասպեկտներից և չորեքշաբթի օրը կտա խնդրի վերաբերյալ ամբողջական հայտարարություն:

«Ես դրանից հիացած չեմ»,- ասել է Թրամփը: «Դա լավ իրավիճակ չէ։ Ես կասեմ հետևյալը. մենք ցանկանում ենք, որ պատանդները վերադարձվեն, բայց մենք գոհ չենք այն բանից, թե ինչպես դա տեղի ունեցավ այսօր»:

Թրամփը նաև նշել է, որ ՀԱՄԱՍ-ի դեմ հարվածը համարում է արժանի նպատակ, բայց վատ է զգում, որ հարձակումը տեղի է ունեցել Պարսից ծոցի արաբական պետությունում, որը Վաշինգտոնի խոշոր ոչ ՆԱՏՕ-ի դաշնակից է, և որտեղ պաղեստինյան իսլամիստական խմբավորումը երկար ժամանակ ունեցել է իր քաղաքական բազան:

Չորեքշաբթի՝ սեպտեմբերի 10-ին եղան Թրամփի խոստացած հայտարարությունները։ Ըստ այդմ, Վաշինգտոնը հրաժարվում է պատասխանատվության մաս ունենալ Իսրայելի կողմից Կատարին հասցված հարվածի մեջ։ «Սա վարչապետ Նեթանյահուի որոշումն էր, ոչ թե իմը»,- գրել է Դոնալդ Թրամփը Truth սոցիալական իր մեդիահարթակում։

«Ես խոսեցի նաև Կատարի էմիրի և վարչապետի հետ, որոնց հավաստիացրի, որ նման բան այլևս չի կրկնվի»,- գրել է Սպիտակ տան ղեկավարն իր հրապարակման մեջ։